Friday, 4 December 2015

பௌத்த சுவட்டைத்தேடி : 23 ஆண்டு களப்பணியில் 29 சிலைகள்

தமிழ்ப்பல்கலைக்கழகம், மதுரை தம்ம விஜயவிகாரை, புத்தர் ஒளி பன்னாட்டுப் பேரவை சென்னை இணைந்து இன்று (4.12.2015) நடத்தும் பன்முகப் பார்வையில் பௌத்தக்கலை என்ற தலைப்பிலான தேசியக் கருத்தரங்கிற்காக அளிக்கப்பட்ட கட்டுரை.



தமிழகத்தில் கடந்த கால் நூற்றாண்டு காலமாக மேற்கொள்ளப்பட்டு வருகின்ற பௌத்த ஆய்வின்போது 16 புத்தர் சிலைகளையும், 13 சமண தீர்த்தங்கரர் சிலைகளையும் காணும் வாய்ப்பு கிடைத்தது. 1993இல் பௌத்த ஆய்வில் அடியெடுக்கும்போது இவ்வாறாகத் தேடல் முயற்சி அமையும் என்று எதிர்பார்க்கவில்லை. மயிலை சீனி வேங்கடசாமியை அடியொற்றியும், பின் வந்த அறிஞர்களைத் தொடர்ந்தும் சென்ற வகையில் பல இடங்களில் சிலைகளைக் காணமுடிந்தது. தமிழகத்தில் இக்காலகட்டத்தில் இவ்வாறாக அதிக எண்ணிக்கையில் இப்பகுதியில்தான் கண்டுபிடிக்கப்பட்டிருக்கவேண்டும் என்பது என் எண்ணம். பௌத்த ஆய்விற்கு வழிவகுத்துத் தந்த தமிழ்ப்பல்கலைக்கழகத்தை நன்றியோடு, நினைவுகூர்ந்து, என் ஆய்விற்குத் துணை நிற்கும் அனைவருக்கும் நன்றிகூறி  களத்திற்கு அழைக்கின்றேன்.  

களப்பணி மிக எளிதாக இருக்கும் என எண்ணி களத்தில் இறங்கினேன். இறங்கியபின்னர்தான் அதிலுள்ள சிரமங்களை அறியமுடிந்தது. சில இடங்களில் உள்ளூர் மக்கள் தாமாகவே முன்வந்து உதவினர். சில இடங்களில் போதிய உதவி கிடைக்கவில்லை. பல இடங்களில் சிலையைப் பார்க்க அனுமதிகூட கிடைக்கவில்லை. தொடர்ந்து மேற்கொண்ட களப்பணிகளின்மூலமாக அவ்வாறான சிலைகளைப் பற்றிய குறிப்புகளை சேகரிக்க முடிந்தது. ஒவ்வொரு களப்பணியும் ஒரு பாடமாகவே அமைந்தது. 

ஒருங்கிணைந்த தஞ்சாவூர், ஒருங்கிணைந்த திருச்சி, புதுக்கோட்டை மாவட்டங்களை உள்ளடக்கிய சோழ நாட்டில் மேற்கொண்டுவரும் களப்பணியின்போது மங்கலம் (1999), அய்யம்பேட்டை (1999),  புதூர் (2000), கோபிநாதப்பெருமாள்கோயில் (2002)  (தலையின்றி), கோபிநாதப்பெருமாள்கோயில் (2002) (இடுப்புப்பகுதி மட்டும்), குடவாசல் (2002), சுந்தரபாண்டியன்பட்டனம் (2002), திருநாட்டியத்தான்குடி (2003), உள்ளிக்கோட்டை (2005), குழுமூர் (2006), ராசேந்திரப்பட்டினம் (2007), வளையமாபுரம் (2007), திருச்சி (2008), கண்டிரமாணிக்கம் (2012), கிராந்தி (2013), மணலூர் (2015) ஆகிய இடங்களில் 16 புத்தர் சிலைகளைக் காணமுடிந்தது.  

மங்கலம் (1999)
வரலாற்றறிஞர் திரு கி.ஸ்ரீதரன் உதவியுடன் திருச்சி மாவட்டத்திலுள்ள மங்கலம் என்னுமிடத்தில் உள்ள அரவாண்டியம்மன் கோயிலில் கண்டுபிடிக்கப்பட்ட புத்தர் சிலை முதன்முதலாகப் பார்க்கப்பட்ட சிலையாகும். இச்சிலை தமிழகத்திலுள்ள பெரிய புத்தர் சிலைகளில் ஒன்றாகும். வேறு எந்த புத்தர் சிலையிலும் காணப்படாத மீசையுடன் இச்சிலை இருந்தது குறிப்பிடத்தக்கதாகும். இக்கோயிலில் புத்தருக்கு வழிபாடு நடத்தப்படுகிறது.

அய்யம்பேட்டை (1999)
ஆய்வின்போது இந்தியாவிலும், வெளிநாட்டிலும் உள்ள அருங்காட்சியகங்களிலிருந்து நாகப்பட்டின புத்த செப்புத்திருமேனிகளின் புகைப்படங்கள் பெருமுயற்சி எடுத்து தொகுக்கப்பட்டன. அவ்வாறான பணியின்போது வரலாற்றறிஞர் திரு அய்யம்பேட்டை செல்வராஜ், தஞ்சாவூர் மாவட்டம் அய்யம்பேட்டையில் நாகப்பட்டின புத்த செப்புத்திருமேனியின் அமைப்பில் ஒரு சிற்பத்தைக் கண்டுபிடிக்க உதவியாக இருந்தார். தஞ்சாவூரிலுள்ள கலைக்கூடத்தில் ஒரு நாகப்பட்டின செப்புத்திருமேனி காட்சிக்கு வைக்கப்பட்டுள்ளது. 

புதூர் (2000)
25 கிமீ மிதிவண்டியில் சென்று பார்த்த வித்தியாசமான அனுபவத்தைத் தந்தது புதூரிலுள்ள புத்தர் சிலை. அசராமல் உடன் மற்றொரு மிதிவண்டியில் வந்த திரு மழவை சிங்காரவேலன் என்னைவிட அதிகமாகக் காணப்பட்டார். உள்ளூரில் இந்த புத்தரை வழிபட்டு வருகின்றனர். புதூரில் குளம் வெட்டும்போது இச்சிலை கிடைத்ததால் குளம் இருக்கும் இடத்தை போத்தன்குட்டை (புத்தன்குட்டை) என்றழைக்கின்றனர்.இச்சிலையை உள்ளூரில் வழிபட்டு வருகின்றனர்.

கோபிநாதப்பெருமாள்கோயில் (2002)  (தலையின்றி)
தஞ்சாவூர் மாவட்டம் கோபிநாதப்பெருமாள் கோயிலிலிருந்து திருவலஞ்சுழி செல்லும் சாலையில் கோபிநாதப்பெருமாள்கோயில் என்னும் இடத்தருகே தலையில்லாத புத்தர் சிலையைக் காணமுடிந்தது. களப்பணியின் முதன்முதலாக தலையில்லாமல் பார்த்த புத்தர் சிலை இதுவேயாகும். தொடர்ந்து மேற்கொண்ட களப்பணியின்போது இராயம்புரம், கீழக்குறிச்சி, வளையமாபுரம், மணலூர் உள்ளிட்ட பல இடங்களில் தலையில்லாத புத்தர் சிலைகளைக் காணமுடிந்தது. 

கோபிநாதப்பெருமாள்கோயில் (2002) (இடுப்புப்பகுதி மட்டும்)
கோபிநாதப்பெருமாள் கோயிலில் காணப்பட்ட புத்தர் சிலையைப் பற்றி பேட்டி எடுக்க தனியார் தொலைக்காட்சியினருடன் அங்கு சென்றபோது உடன் வந்த தொலைக்காட்சி நண்பர் உதவியுடன் மற்றொரு புத்தர் சிலையின் இடுப்புப்பகுதி மட்டும் கண்டுபிடிக்கப்பட்டது. முந்தைய புத்தர் சிலை இருந்த இடத்திலிருந்து சற்று தூரத்தில் இச்சிலை காணப்பட்டது. தற்போது இந்த இரு சிலைகளும் அங்கு காணப்படவில்லை.

குடவாசல் (2002)
குடவாசல் பகுதியில் புத்தர் சிலையில் தலைப்பகுதி ஒன்றினைப் பார்த்து அதன் புகைப்படத்தை ஆய்வாளர் திரு கோவிந்தராஜ் காண்பித்தார். முதன்முதலாக தனியாக புத்தரின் தலைப்பகுதியைப் மட்டும் பார்த்தது குடவாசல் பகுதியிலிருந்துதான். தொடர்ந்து மேற்கொண்ட களப்பணியின் போது இவ்வாறான புத்தர் சிலையின் தலைகளை பெரண்டாக்கோட்டை, முழையூர் ஆகிய இடங்களில் காணமுடிந்தது.

சுந்தரபாண்டியன்பட்டனம் (2002)
வரலாற்றுப்பேராசிரியர் திரு சந்திரபோஸ் உதவியுடன் புதுக்கோட்டை ராமநாதபுரம் எல்லையில் சுந்தரபாண்டியன்பட்டனத்தில் உள்ள ஏகாம்பரேஸ்வரர் காமாட்சியம்மன் கோயில் வளாகத்தில் ஒரு புத்தர் சிலை கண்டுபிடிக்கப்பட்டது. இச்சிலை நின்ற நிலையில் இருந்தது. களப்பணியின்போது முதன்முதலாக நின்ற நிலையில் காணப்பட்ட புத்தர் சிலை இதுவாகும். வரலாற்றறிஞர் முனைவர் ராஜா முகமது இச்சிலையைப் பற்றி விவாதித்துள்ளார். சோழ நாட்டைச் சேர்ந்த, ஆய்வுப்பகுதியில் இல்லாத இடமாக இருந்தாலும் அருகில் உள்ள மாவட்டம் என்ற நிலையில் இவ்விடத்தில் களப்பணி மேற்கொள்ளப்பட்டது. நாகப்பட்டின புத்த செப்புத்திருமேனியைப் போல இச்சிலை காணப்படும். 

திருநாட்டியத்தான்குடி (2003)
வரலாற்றறிஞர் முனைவர் குடவாயில் பாலசுப்பிரமணியன், திரு கண்ணன் ஆகியோருடன் மேற்கொண்ட களப்பணியின்போது திருவாரூர் மாவட்டம் திருநாட்டியத்தான்குடியில் அமர்ந்த நிலையிலான புத்தர் சிலை கண்டுபிடிக்கப்பட்டது. தொடர்ந்து மேற்கொண்ட களப்பணியின்போது தலைப்பகுதியைக் காணமுடியவில்லை.  

உள்ளிக்கோட்டை (2005)
உள்ளிக்கோட்டையைச் சேர்ந்த திரு மாதவகுமாரசுவாமி உதவியுடன் இச்சிலை கண்டுபிடிக்கப்பட்டது. அமர்ந்த நிலையில் தியான கோலத்தில் இருந்த இந்த அழகான சிலையினைப் பற்றி உள்ளூரில் ஒரு கதையைக் கூறிவருகின்றனர். அடுத்த முறை இந்த சிலையைக் காணச் சென்றபோது அச்சிலை காணாமல் போயிருந்தது. நன்கு விசாரித்தும் எவ்வித செய்தியும் கிடைக்கவில்லை.

குழுமூர் (2006)
இதழில் வந்த செய்தியின் அடிப்படையில் திரு அரும்பாவூர் செல்வபாண்டியன் உதவியுடன் இச்சிலையைக் கண்டுபிடிக்கும் வாய்ப்பு கிடைத்தது. பராமரிப்பு எதுவும் இல்லாமல் இருந்த சிலையினை சுத்தம் செய்து உள்ளூர் மக்களிடம் அச்சிலையைப் பற்றிய செய்தியைக் கூறிவிட்டு வந்தோம். அமர்ந்தநிலையில் அழகாக இருந்த சிலையின் தலைப்பகுதி பின்னர் காணாமல் போய்விட்டதாகக் கூறினர்.  

ராசேந்திரப்பட்டினம் (2007)
வரலாற்றறிஞர் திரு அனந்தபுரம் கிருட்டினமூர்த்தி, திருகடலூர் வேல்முருகன், திரு ராஜேந்திரப்பட்டினம் சிவக்குமார் உதவியுடன் இச்சிலையைக் காணமுடிந்தது. அமர்ந்த நிலையில் தியான கோலத்தில் இருந்த இந்த சிலை பல ஆண்டுகளாக அவ்விடத்தில் இருப்பதாகக் கூறினர். இச்சிலையை இங்கு மஞ்சள் விற்கும் செட்டியார் என்று குறிப்பிடுவதைக் களப்பணியின்போது அறியமுடிந்தது. இப்பகுதி ஆய்வுப்பகுதியாக இல்லாவிட்டாலும்கூட புத்தர் சிலை என்ற நிலையில் அங்கு களப்பணி மேற்கொள்ளப்பட்டது.

வளையமாபுரம் (2007)
பல வருடங்களுக்கு முன்பே வலங்கைமான் பகுதியில் சில புத்தர் சிலைகள் இருப்பதாகக் களப்பணியின்போது அறிந்தேன். இப்பகுதியைச் சேர்ந்த மிகச் சிறிய அளவிலான புத்தர் சிலை கங்கைகொண்ட சோழபுரம் அருங்காட்சியகத்தில் காட்சிப்படுத்தப்பட்டுள்ளது. மற்றொரு சிலையினை களப்பணியின்போது காணமுடிந்தது. கோபிநாதப்பெருமாள் கோயிலில் கண்டுபிடிக்கப்பட்ட சிலையினைப் போல இச்சிலை தலையின்றி காணப்பட்டது. தமிழகத்தில காணப்படுகின்ற பெரிய புத்தர் சிலைகளில் இதுவும் ஒன்றாகும். வயல் வரப்பில் அமர்ந்திருந்த கோலத்தில் இருந்த இச்சிலை கம்பீரமாக இருந்தது.

திருச்சி (2008)
திருச்சியில் உள்ள பெரியார் நூற்றாண்டு கல்வி வளாகத்தில் பெரியார் தொடக்கப்பள்ளி ஆசிரியர் திரு அன்பழகன் தந்த தகவலின் அடிப்படையில் ஒரு புத்தர் சிலையைக் காணமுடிந்தது. அமர்ந்த நிலையில் தியான கோலத்தில் உள்ள இந்த புத்தர் சிலை சற்றொப்ப சோழ நாட்டில் காணப்பட்டுள்ள பிற புத்தர் சிலைகளின் கலைப்பாணியைக் கொண்டு உள்ளது. 

கண்டிரமாணிக்கம் (2012)
திருவாரூர் மாவட்டம் குடவாசல் வட்டம் கண்டிரமாணிக்கம் என்னுமிடத்தில் ஒரு வீட்டுக்கொல்லையில் பள்ளம் தோண்டும் போது புத்தர் சிலை கண்டெடுக்கப்பட்டதாக தகவல் கிடைத்ததன் அடிப்படையில் வரலாற்றறிஞர் முனைவர் குடவாயில் பாலசுப்ரமணியன் துணையோடு அங்கு சென்றபோது அமர்ந்த நிலையிலான புத்தர் சிலையைக் காணமுடிந்தது.  முதலாம் ராஜராஜன் நாகப்பட்டினத்திலிருந்த புத்த விகாரத்திற்கு நிலதானம் அளித்தபோது அந்தச் சாசனத்தில்ர கையொப்பமிட்ட ஒருவரான ஸ்ரீதரபட்டன் என்பவர் கண்டிரமாணிக்கத்தைச் அடுத்த சீதக்கமங்கலத்தைச் சேர்ந்தவர் என்று முனைவர் குடவாயில் சுப்பிரமணியன் தெரிவித்தார். இப்போது இச்சிலை திருவாரூரில் உள்ளது.

கிராந்தி (2013)
நாகப்பட்டினத்தைச்சேர்ந்த வரலாற்று ஆர்வலர் திரு இராமச்சந்திரன் தந்த தகவலின் அடிப்படையில் திரு தில்லை கோவிந்தராஜனுடன் மேற்கொண்ட களப்பணியின் அமர்ந்த நிலையிலான புத்தர் சிலையைக் காணமுடிந்தது. களப்பணியின்போது வேறு எங்கும்காணாத வகையில் சிலையின் இந்த பீடத்தில் கிராந்தி தெப்பிள்ளை என்ற  கி.பி.11-12ஆம் நூற்றாண்டைச் சேர்ந்த தமிழ் எழுத்து உள்ளதைக் காணமுடிந்தது.  கிராந்தி தெப்பிள்ளை என்பது இந்த சிலையைக் கொடையாக கொடுத்தவரைக் குறிக்கும் என்று தில்லை கோவிந்தராஜன் கூறினார்.

மணலூர் (2015)
மணலூரைச் சேர்ந்த பள்ளி ஆசிரியர் திரு சேதுராமன் தந்த தகவலின் அடிப்படையில் தமிழ்ப்பண்டிதர் திரு மணி.மாறனுடன் மேற்கொண்ட களப்பணியின்போது அமர்ந்த நிலையிலான புத்தர் சிலை கண்டுபிடிக்கப்பட்டது. இச்சிலையும் தலையில்லாமல் இருந்தது. சுமார் 20 ஆண்டுகளுக்கு முன் திரு அய்யம்பேட்டை செல்வராஜ், அய்யம்பட்டைக்குத் தெற்கே 3 கிமீ தொலைவில் வையச்சேரி கிராமத்தின் குளக்கரையில் புத்தர் சிலையின் தலைப்பகுதி இருப்பதாகக் கூறி அதன் புகைப்படத்தை அனுப்பியிருந்தார். அப்போது அங்கு சென்றபோது தலைப்பகுதியைக் காணமுடியவில்லை. இந்நிலையில் மணலூரில் கண்டெக்கப்பட்ட புத்தர் சிலை, வையச்சேரியில் கண்டெடுக்கப்பட்ட தலைப்பகுதியுடன் பொருந்த வாய்ப்புள்ளது. 

சமண தீர்த்தங்கரர் சிலைகள்
புத்தர் சிலைகளைத் தேடி களப்பணி மேற்கொண்ட போது ஜெயங்கொண்டம் (1998),  காரியாங்குடி (1998), ஆலங்குடிப்பட்டி (1999), செங்கங்காடு (1999), தஞ்சாவூர் (1999),  பெருமத்தூர் (1999), அடஞ்சூர் (2003), செருமாக்கநல்லூர்  (2009), சுரைக்குடிப்பட்டி (2010), பஞ்சநதிக்குளம் (2010),  தோலி (2011),  கவிநாடு (2013), நாட்டாணி (2015) ஆகிய இடங்களில் சமண தீர்த்தங்கரர் சிலைகள் கண்டுபிடிக்கப்பட்டன. தனியாகவும், திரு தில்லை கோவிந்தராஜன், முனைவர் சந்திரபோஸ், திரு மணி.மாறன் ஆகியோரின் உதவியுடனும் கண்டுபிடிக்கப்பட்டன. 

களப்பணியில் வெள்ளிவிழா ஆண்டினை நெருங்கிவரும் நிலையில் 29 சிலைகள் கண்டுபிடிக்கப்பட்டபோது கிடைத்த அனுபவங்கள் சோழ நாட்டில் பௌத்தம் வேரூன்றி இருந்த நிலையை எடுத்துக்காட்டுகின்றது. பல இடங்களில் புத்தர் சிலைக்கு வழிபாடுகள் நடத்தப்பட்டு வருகின்றன. புத்தர், சமணர், பழுப்பர், சாம்பான், சிவனார், முனீஸ்வரன் என்ற பலவாறான பெயர்களில் புத்தரை அழைத்து வருகின்றனர். முந்தைய களப்பணின்போது பார்த்த சிலைகள் அடுத்தடுத்த களப்பணிகளின்போது காணாமல் போயிருப்பதைப் பார்க்கும்போது சற்றே வேதனையாக இருந்தது. இந்த சிலைகள் நம் வரலாற்றின் எச்சங்கள் என்ற நிலையிலும், பௌத்த சமயம் சோழ நாட்டில் நல்ல நிலையில் பரவியிருந்ததை உணர்த்தும் சான்றுகள் என்ற நிலையிலும் உரிய முறையில் பாதுகாக்கவேண்டியது அனைவரின் கடமையாகும்.

During the field study carried out, from 1993 to 2015, in the Chola country in Tamil Nadu comprising composite Thanjavur, composite Trichy and Pudukottai districts Buddha statues were found in Mangalam (1999), Ayyampet (1999), Puthur (2000), Gopinathaperumalkovil (2002) (Two statues), Kudavasal (2002), Sundarapandianpattinam (2002), Tirunattiyattankudi (2003), Ullikottai (2005), Kuzhumur (2006), Rajendrapattinam (2007), Valayamapuram  (2007), Trichy (2008), Kandramanickam (2012), Kiranthi (2013) and Manalur (2015). Jain Tirthankaras were found in Jayamkondam (1998),  Kariyankudi (1998), Alangudipatti (1999), Sengangadu (1999), Thanjavur (1999), Perumattur (1999), Adanjur (2003), Serumakkanallur  (2009), Suraikkudipatti (2010), Panchanathikulam (2010), Doli (2011), Kavinadu (2013) and Nattani (2015)


---------------------------------------------------------------
வரலாற்றறிஞர் திரு அனந்தபுரம் கிருட்டினமூர்த்தி மற்றும் வலைப்பதிவர் திரு கரந்தை ஜெயக்குமார் ஆகியோருடன் விக்ரமம் புத்தர் சிலையைப் பார்க்கச் சென்றபோது பெற்ற அனுபவம் பற்றி நண்பர் திரு கரந்தை ஜெயக்குமார் தன் தளத்தில் பதிவிட்டுள்ளார். அவருக்கு என் நன்றி.

---------------------------------------------------------------

Sunday, 1 November 2015

பௌத்த சுவட்டைத் தேடி : விக்ரமம்

1999இல் பார்த்த ஒரு புத்தர் சிலையை மறுபடியும் பார்க்கச் சென்றபோது கிடைத்த அனுபவங்களைக் காண தஞ்சாவூர் மாவட்டத்திலுள்ள விக்ரமம் செல்வோம், வாருங்கள்.

29 ஜனவரி 1999
விக்ரமம், பள்ளிவிருத்தி, பூதமங்கலம் களப்பணி சென்றபோது விக்ரமம் களப்பணி மேற்கொண்டேன். தஞ்சாவூர்-பட்டுக்கோட்டை-மதுக்கூர் பேருந்தில் சென்று, மதுக்கூரிலிருந்து ஒரு சைக்கிளை வாடகைக்கு எடுத்துக்கொண்டு இரண்டு கிமீ தொலைவில் உள்ள விக்ரமம் சென்றேன். விசாரித்து, புத்தர் சிலை இருந்த இடத்திற்குச் சென்று, புத்தரைப் பார்த்தேன். போதிய நேரமின்மையால் உரிய விவரங்களைச் சேகரிக்கமுடியவில்லை.

13 பிப்ரவரி 1999
மறுபடியும் விக்ரமம். தோப்பில் இருந்த புத்தரைக் காண திரு குழந்தைவேலு உதவி செய்தார். இச்சிலையை செட்டியார் சிலை என்றும், சிலை இருக்கும் இடத்தை புத்தடி செட்டிக்கொல்லை என்றும் கூறினார். அவரது தாயார் திருமதி பாக்கியத்தம்மாள் (72) அந்த புத்தரைப் பற்றிப் பின்வருமாறு கூறினார்.  "வருடப்பிறப்பு, தீபாவளி, பொங்கலின்போது தேங்காய் உடைத்து சாம்பிராணி போடுவோம். முதலில் எண்ணெய் எடுக்கும்போது புத்தருக்கு சாத்திவிட்டே பயன்படுத்துவோம்...அவ்வப்போது வேண்டுதல் செய்பவர்கள் தேங்காய் உடைத்து நிவர்த்திக்கடனை நிறைவேற்றுவர். புதிய வேலை ஆரம்பிக்கும்போது இந்த புத்தருக்கு மாலை போட்டுவிட்டு ஆரம்பிப்பர். எனக்கு நல்ல நினைவு. 60 வருடங்களுக்கு முன் இங்கே மூட்டைப்பூச்சி தொல்லை அதிகமாக இருந்தது. புத்தருக்கு பூசை செய்தால் மூட்டைப்பூச்சித் தொல்லை குறையும் என்று கூறி பூசை செய்வர். "  


விக்ரமம் புத்தர் (1999)
அவர்கள் இருவருக்கும் நன்றி கூறிவிட்டுத் திரும்பும்போது அருகில் வேறு ஏதாவது புத்தர் சிலை இருக்கிறதா என்று விசாரித்துக்கொண்டே வந்தேன். அப்போது செங்கங்காடு என்னும் இடத்தில் ஒரு புத்தர் சிலை இருப்பதாகக் கூறினர். சென்றுபார்த்தபோது சமணர் என்பதை அறிந்தேன். அந்த சிலையைப் பற்றி மற்றொரு பதிவில் பார்ப்போம். 

7 ஜுலை 2009
விக்ரமத்தைச் சேர்ந்த முனைவர் சிவசுப்பிரமணியன் (உதவிப்பேராசிரியர், சுற்றுச்சூழல் அறிவியல் மற்றும் மூலிகை அறிவியல் துறை, தமிழ்ப்பல்கலைக்கழகம்) இச்சிலை நன்கு பராமரிக்கப்பட்டு வருவதாகவும், முன்பிருந்த இடத்திலிருந்து மாறி தற்போது அருகில் மதுக்கூர்-காடந்தங்குடி சாலையில் வைக்கப்பட்டுள்ளதாகவும் கூறினார்.

4 ஜனவரி 2015
நான் பார்த்த புத்தர் சிலைகளைப் பார்க்கவேண்டும் என்று பல நண்பர்களும், அறிஞர்களும் என்னுடன் கூறியுள்ளனர். அவ்வாறான நண்பர்களில் ஒருவர் வலைப்பூவில் அருமையான கட்டுரைகளை எழுதி சாதனை படைத்து வருகின்ற  திரு திரு கரந்தை ஜெயக்குமார்.  வாய்ப்பு கிடைக்கும்போது அழைத்துச்செல்வதாக அவரிடம் கூறியிருந்தேன். அதற்கான வாய்ப்பு ஜனவரி 2015இல் அமைந்தது. தஞ்சாவூருக்கு ஒரு கருத்தரங்கிற்காக வந்த வரலாற்றறிஞர் திரு அனந்தபுரம் கிருட்டினமூர்த்தி அவர்கள் இப்பகுதியில் உள்ள புத்தர் சிலையைப் பார்க்கவேண்டும் என்று கூறினார். எனது பௌத்த ஆய்வின்போது கடலூர் மாவட்டத்தில் புத்தர் சிலைகளை இவரது துணையுடன் நான் பார்த்துள்ளேன். 15 ஆண்டுகளுக்கு முன் நான் முதன்முதலாகப் பார்த்த புத்தர் சிலையை தற்போது மறுபடியும் பார்ப்பதற்காக நாங்கள் மூவரும் கிளம்பினோம்.  அதற்கு முன்பாக புள்ளமங்கை கோயிலுக்குச் சென்று அங்குள்ள சிற்பங்களைப் பார்க்க அவர் விரும்பவே, இதற்கு முன்னர் நான் பல முறை புள்ளமங்கை கோயிலுக்குச் சென்றோம். புள்ளமங்கையின் கலை அழகை ரசித்துவிட்டு அங்கிருந்து விக்ரமம் சென்றோம்.

செல்வதற்கு முன்பாக முனைவர் சிவசுப்பிரமணியம் அவர்களைத் தொடர்பு கொண்டபோது சிலை இருக்கும் இடத்தை உறுதி செய்து, அவரது சகோதரர் திரு குழந்தைவேலு அங்கே இருப்பதாகவும் சிலையைப் பார்க்க உதவுவார் என்றும் கூறியிருந்தார். விக்ரமம் சென்றதும் அவரைத் தொடர்பு கொண்டோம். சிலை இருக்கும் இடத்திற்கு எங்களை அழைத்துச் சென்றார். தோப்பில் அமைதியாக அமர்ந்த நிலையில் தியான கோலத்தில் இருந்த புத்தரைக் கண்டோம். கடந்த முறை நான் வந்ததை நினைவுகூர்ந்து மறுபடியும் வந்தமைக்குப் பாராட்டினார். வழக்கம்போல் புத்தர் சிலைகளுக்குள்ள கூறுகளைக் கண்டோம்.  அவ்வபோது பலர் வந்து இந்த புத்தர் சிலையைப் பார்த்து செல்வதை அறிந்தோம்.
  
விக்ரமம் புத்தருடன்  பா.ஜம்புலிங்கம்  
விக்ரமம் புத்தர் (2015)
விக்ரமம் புத்தருடன் திரு அனந்தபுரம் கிருட்டினமூர்த்தி, பா.ஜம்புலிங்கம்  

விக்ரமம் புத்தருடன் திரு அனந்தபுரம் கிருட்டினமூர்த்தி, பா.ஜம்புலிங்கம், திரு குழந்தைவேலு

15 வருடங்களுக்கு முன் பார்த்த புத்தர் சிலையை மறுபடியும் பார்த்த மன நிறைவுடன் அங்கிருந்து கிளம்பினோம்.

நன்றி
புத்தரைப் பற்றிய செய்தி (1999) கூறிய திருமதி பாக்கியத்தம்மாள்
களப்பணி வந்ததோடு புகைப்படங்கள் எடுத்து உதவிய திரு கரந்தை ஜெயக்குமார்
களப்பணியில் உடன் வந்த திரு அனந்தபுரம் கிருட்டினமூர்த்தி 
தகவல் கூறிய முனைவர் சிவசுப்பிரமணியன்
இரு களப்பணியின்போதும் உதவிய திரு குழந்தைவேலு


--------------------------------------------------------------------------------
உங்களுடன் பகிர்ந்துகொள்ள மற்றொரு மகிழ்ச்சியான செய்தி

தமிழ் விக்கிபீடியாவின் முதற்பக்கத்தில் பங்களிப்பாளர் அறிமுகம்
இன்று (நவம்பர் 1, 2015) முதல் என்னைப் பற்றிய பங்களிப்பாளர் அறிமுகம் தமிழ் விக்கிபீடியாவில் முதற்பக்கத்தில் வெளியாகிறது என்பதைத் தெரிவிப்பதில் மகிழ்ச்சியடைகின்றேன். இந்த அறிமுகமானது தொடர்ந்து சில நாள்களுக்கு முதல் பக்கத்தில் காணப்படும் என்பதைத் தெரிவித்துக் கொள்வதில் மகிழ்கின்றேன். தமிழ் விக்கிபீடியாவில் பங்களிக்கத் தொடங்கி 250 கட்டுரையை அண்மையில் நிறைவு செய்த நிலையில் இவ்வாறான ஒரு அறிமுகம் என்னை மென்மேலும் எழுத ஊக்குவிக்கும் என்று நம்புகிறேன்.
பங்களிப்பாளர்கள் பக்கத்தில் என்னைப் பற்றிய அறிமுகம்
--------------------------------------------------------------------------------

பதிவு நவம்பர் 1, 2015 இரவு 10.10க்கு மேம்படுத்தப்பட்டது.

Thursday, 1 October 2015

பௌத்த நல்லிணக்க சிந்தனைகள்

முந்தைய பதிவுகளில் பௌத்தம் தொடர்பாக களப்பணிகள் குறித்தும், பௌத்தம் தொடர்பாக வெளிவந்த நூல்கள் குறித்தும் விவாதிக்கப்பட்டன. இப்பதிவில் பௌத்தம் போற்றும் நல்லிணக்கச் சிந்தனைகளைக் காண்போம். பௌத்தம் போதித்த முதன்மையான நன்னடத்தைகள் அன்புறு நேயம், கருணை, இரக்க நல்லின்பம், நிதானம் ஆகியவையாகும். இவற்றில் அன்புறு நேயம் முதலிடத்தைப் பெறுகிறது. இவ்வாறான நேயம் காணப்படும்போது வாழ்வில் நிம்மதியைக் காணமுடிகிறது. அது வீட்டையும் நாட்டையும் மேம்படுத்தும்.

நல்லிணக்கத்தின் அடிப்படை அன்பு
நல்லிணக்கம் பேணப்படுவதற்கு அன்பு அடிப்படையாக அமைகிறது. நல்ல சிந்தனைகள் மேம்படும் நிலையில்  நல்லிணக்கம் நிலவும். அவ்வாறான நல்லிணக்கத்தை பல நிலைகளில் உருவாக்கிக்கொள்ள முடியும்.

பகைமை தவிர்த்தல்
"இவ்வுலகில் எக்காலத்தும் பகைமை பகைமையால் தணிவதில்8ல. பகைமை அன்பினாலோய தணியும். இதுவே பண்டைய நெறி" என்கிறது பௌத்த அடிப்படை நூலான தம்ம பதம்"தாய் தன் சேயை அரவணைத்துப் போற்றுவது போல, உங்கள் அன்பு உலகிலே பரவட்டும், ஒவ்வோர் உயிரையும் அரவணைத்துக் கொள்ளட்டும், தடையற்ற சுதந்திரத்துடன் அது உயரேயும் கீழேயும் பறக்கட்டும், துவேஷமும், பகையும் விலகி ஒழியட்டும் என்கிறது பௌத்த நூலான சுத்த நிபாதம்

கோபத்தை அடக்குதல்
"வாக்கினால் வரும் கோபத்தை அடக்கிக் காக்கவும். நா அடக்கத்தில் பழகவேண்டும். வாக்கினால் உண்டாகும் தீமையை அழித்து நல்லொழுக்கத்தைதப் பேணி வருக" என்றும், "மனத்தினால் வரும் கோபத்தை அடக்கிக் காக்கவும், மன அடக்கத்தில பழகவேண்டும். மனத்தில் உண்டாகும் தீமையை ஒழித்து நல்ல ஒழுக்கத்தைப் பேணி வருக" என்றும் தம்ம பதம் கூறுகிறது. எது நல்லது, எது தீயது என்பதைக் கண்டறிய கௌதம புத்தர் ஓர் எளிய வழியைக் காட்டியுள்ளார். "தங்களின் செயற்பாடுகள் தங்களுக்கோ பிறருக்கோ துன்பமிழைக்காவிட்டால் அதனை மேற்கொள்ளுங்கள். அவை திறனுடையவை, முழு நிறைவானவை, நல்லவை" என்பதே அவர் காட்டிய வழி.

துன்பம் தரா செயல்பாடுகள்
எவருக்கும் துன்பமிழைக்கா வகையில் அமையும் செயல்பாடுகள் அனைத்தும் நல்லிணக்கத்தில் முடியும். அச்சூழலில் சாத, சமயம், இனம், குலம் என்ற எந்தப் பிரிவுகளும் ஒரு தடையாக இருக்க வாய்ப்பில்லை. அவ்வாறு இல்லாத நிலையில்தான் மனித நேயம் மாய்க்கப்பட்டு, நல்லிணக்கம் என்ற ஆணிவேர் ஆட்டம் காண்கிறது. இதன் இறுதி நிலை வன்முறையில் வந்துமுடிகிறது. "வன்முறை விளைவிப்பது அச்சமே. தேசமே சச்சரவில் மூழ்கிவிடும். கொடூரமாய் மக்கள் திரிவதைக் காணுங்கள். பேராசை, வெறுப்பு, தற்பெருமை போன்றவற்றைக் கடக்கும் நிலையில் மக்கள் எங்கும் எப்போதும் இன்பமும் அமைதியும் அடையலாம்" என்கிறது சுத்த நிபாதம்.  

மானுடத்தின் ஒருமை
வாசெட்ட சுத்தம் எனப்படும் பௌத்த நூல் அனைத்து மனிதர்களும் ஒரே உயிரியல் வகையைச் சார்ந்தவர்கள் என்று கூறுகிறது. "தாவரங்களுக்கிடையேயும், விலங்குகளுக்கிடையேயும், பறவைகளுக்கிடையேயும், மீன்கள், பூச்சிகள், பாலூட்டிகள் ஆகியவற்றுக்கிடையேயும்  பல வகைகளும் இனங்களும் உள்ளன. ஆனால் மனிதரிடையே வேறுபாடு இல்லை". பிறப்பால் எவ்வித வேறுபாடும் இல்லாத நிலையில், ஒருவர் செய்யும் செயல்களே அவரை மேன்மக்களாக்கும். அவ்வாறான செயல்கள் நல்லிணக்கத்தை வளர்ப்பதாய் அமைய வேண்டும்.  

வீழ்ச்சிக்கான காரணங்கள்
"தீயோரை விரும்புவதும் நன்னடத்தையை வெறுப்பதும், பிறப்பு, செல்வம், குலம் ஆகியவற்றைக் கொண்டு பெருமைப்பட்டுப் பிறரைத் தூற்றுதலும், ஆட்சி அதிகாரத்திற்கு ஆசைப்படுதலும் ஒரு மனிதனின் வீழ்ச்சிக்குரிய காரணங்கள் பராபவ சுத்தம் என்ற பௌத்த நூல் வீழ்ச்சிக்கான காரணங்கள் என்று கூறுகிறது.

தாழ்வுற்ற மனிதன்
பௌத்தம், பிறப்பால் எவரும் தாழ்வுற்ற மனிதன் இல்லை என்றும், பிறப்பால் எவரும் உயர்ந்த மனிதன்  இல்லை என்றும் கூறுகிறது. வசல சுத்தம் என்ற பௌத்த நூல், "எவனொருவன் முன்கோபமுடையவனோ, வஞ்சகனோ, தன்னலமுடையவனோ, உயிர்களை வதைப்பவனோ, கருணையற்றவனோ, நல்லறிவுரைகளை மறந்துவிடுகின்றவனோ, பிறரைத் தவறாக வழிநடத்துகின்றவனோ, தீயவை புரிந்துவிட்டு நன்மை புரிந்ததுபோல நடக்கின்றவனோ, தற்பெருமையால் தன்னை உயர்த்திப் பேசிப் பிறரைத் தாழ்த்துகின்றானோ அவனே கீழான மனிதன்" என்று கூறுகிறது.

சமத்துவ நிலை
குலம், சாதி, இனம் என்ற பல்வேறு நிலைகளில் ஒவ்வொருவரும் வேறுபட்டு நிற்கும்போது அமைதியின்மை ஏற்படுகிறது. அதுதவிர பொறாமை, கோபம், வஞ்சம் போன்ற குணங்களும் பற்றிவிடுகின்றன. இவற்றிலிருந்து விடுபட சமத்துவ நிலையில் இருக்கவேண்டும் என்கிறது பௌத்தம். "சமத்துவ நிலைச் சாதனையைப் பயில்வாயாக. அதனால் எதிர்ப்புணர்ச்சியெல்லாம் கைவிடப்படும்" என்கிறது பௌத்த நூலான மத்யம நிகாயம். 

பிறர்க்குத் துன்பமோ, இன்பமோ எது நேர்ந்தாலும், அது தமக்கு நேர்ந்ததாகக் கருதக்கூடிய அளவு மனதைப் பக்குவப்படுத்திக் கொள்ளவேண்டும். இவ்வாறான மனப்பக்குவம் நல்லிணக்கத்தை நம்முள் மேம்படுத்தும். இது போன்ற கோட்பாட்டினைத் தீர்மானிக்கும்போது புத்தர் கீழ்க்கண்டவற்றை வலியுறுத்துகிறார். இவற்றை நாம் மனதில் கொள்வோம். நல்லிணக்கச் சிந்தனைகளை மேம்படுத்துவோம்.

"நல்லோர்க்கு நான் நன்மை செய்கிறேன்.
தீயோர்க்கு நான் நன்மை செய்கிறேன். 
எனவே நான் நான்மையே செய்கிறேன்
-----------------------------------------------------------------------------
21.3.2010இல் மயிலாடுதுறை ஏ.வி.சி.கல்லூரியில் நடைபெற்ற மத நல்லிணக்கக் கருத்தரங்கில் அளிக்கப்பட்ட கட்டுரையின் சுருக்கம்.
-----------------------------------------------------------------------------



தி இந்து நாளிதழின் ஆண்டு விழாவையொட்டி, அவ்விதழைப் பற்றி நான் எழுதிய கடிதம் 27.9.2015 அன்று வெளியாகியுள்ளது. வெளியிட்ட தி இந்துவுக்கு நன்றி.

Tuesday, 1 September 2015

Buddha spotting in Chola country fills his weekends: Times of India

Feel happy to share my interview, "Buddha spotting in Chola country fills his weekends", which appeared in Times of India of 29th October 2012, with due thanks to Times of India. 
29 அக்டோபர் 2012இல் டைம்ஸ் ஆப் இந்தியா இதழில் வெளியான எனது பேட்டியைப் பகிர்வதில் மகிழ்கின்றேன், அவ்விதழுக்கு நன்றியுடன்.  

Chennai: 
B Jambulingam’s search for Buddha idols began with an ordinary visit to a remote village in Thanjavur in the 1980s. The villagers had excavated a Buddha idol, and Jambulingam noted down the dimensions of the stone idol on a cigarette packet. Back home in Thanjavur, he started studying various aspects of the idol.

    His research drew him to Buddhism, and he began travelling to villages across Tamil Nadu in search of Buddha statues.

    He once pedalled more than 25 miles on his old Hercules bicycle to see a Buddha idol in Puthur. Jambulingam has identified 66 Buddha idols in the erstwhile Chola country, and the journey is still on.

    “I have found 66 Buddha statues in Thanjavur, Tiruchi and Pudukottai districts during my field study. Many were in the sitting posture. The latest Buddha, the 66th, was found during my study in Kandramanickam in July 2012,” he said.

    The most interesting was a Buddha with a mustache in Tiruchi. “It was in Mangalam where I saw a Buddha with a mustache. Nowhere in Tamil Nadu is such a style seen,” said Jambulingam, who works as a superintendent at Tamil University, Thanjavur.

    Jambulingam decided to study the various aspects of Buddhism and registered at Madurai Kamaraj University in 1995. “I would keep a notebook with particulars of Buddha statues found in the area. I first recorded the information given by Mayilai Seeni Venkatasamy, a scholar. Then I started collecting books. I use all weekends and holidays for my trips.

    In some cases, I found statues on my first trip. In others, it was not so easy,” says the 54 year old.

    Buddhism came to Tamil Nadu during the 3rd century BC and prevailed in the Chola country up to the 16th century AD. Buddha v i h a r a s were found in many places including Poompuhar and Nagapattinam. The remnant of a vihara is still intact in Poompuhar.

    Jambulingam said he is upset by the way some of the idols are maintained. While some are well cared for, many are not. The Buddha that he first saw at Manambadi in Kumbakonam was shifted to a nearby Amman temple, and the one he found close to a meter gauge rail track in Coutrallam was shifted to a place nearby for safety.

    However,the Buddha idol that he discovered at Kurumbur in Pudukottai is missing. “Some of the Buddha statues that earlier scholars have written about are now missing. Similarly, some Buddhas that I identified before are missing. It’s unfortunate,” he said. 
-------------------------------------------------------------------------------------------------------
------------------------------------------------------------------------------------------------------- 
சோழ நாட்டில் பௌத்தம் என்ற தலைப்பிலான  ஆய்வு தொடர்பாக 2008 தொடங்கி வெளியான பிற பேட்டிகளை கீழ்க்கண்ட இணைப்பில் காணலாம். வெளியிட்ட இவ்விதழ்களுக்கு நன்றி.

1)தினமணி 6.1.2008 :
2)ராணி, 3.5.2015 : 
3)தி நியூ இந்தியன் எக்ஸ்பிரஸ்,15.5.2015 :

-------------------------------------------------------------------------------------------
1.11.2015 அன்று மேம்படுத்தப்பட்டது.

Saturday, 1 August 2015

அறிவுப்பேரொளி புத்தர் பெருமான் (வரலாற்று நாடகம்) : பட்டுக்கோட்டை குமாரவேல்

நான் படித்த நூல்களில் ஒன்று அறிவுப்பேரொளி புத்தர் பெருமான். 104 காட்சிகளைக் கொண்ட வரலாற்று நாடகமாக உள்ள இந்நூலில் புத்தரது வரலாற்றை எடுத்துரைக்கிறார் நூலாசிரியர் பட்டுக்கோட்டை குமாரவேல். நாடகப்பாத்திரங்களைப் பட்டியலிட்டுத் தந்துள்ளவிதம், ஒவ்வொரு காட்சியையும் அமைத்துள்ள முறை, நிகழ்வுகளை மனதில் பதியும்வகையில் தந்துள்ள பாங்கு போன்றவை மிகவும் சிறப்பாக இந்நூலில் அமைந்துள்ளன. 15 ஆண்டுகளுக்கு முன்னர் படித்த இந்நூலை அண்மையில் மறுபடியும் படித்தேன். சுமார் 2500 ஆண்டுகளுக்கு முன் நடைபெற்ற அவ்வரலாற்று நிகழ்வை நாடமாக்கித் தந்துள்ள ஆசிரியரைப் பாராட்டி, அந்நூலை வாசிப்போம், வாருங்கள்.


காட்சி 7 (இடம் : அரண்மனை/மன்னர், அரசி, அந்தணர்கள்)
சுத்தோதனர் : ஜோதிட வல்லுநர்களே...இளவரசனின் ஜாதகம் பார்த்து பலனைச் சொல்லி இந்த நாட்டு இளவரசருக்கு நீங்கள் பெயரிடவேண்டும்.
அந்தணர்1 : இளவரசனுக்கு சித்தார்த்தன் என்று பெயரிடுங்கள்.
அந்தணர்2 : குழந்தையின்னி வாழ்க்கை மிக சிறப்பாக இருக்கும்.
அந்தணர்3 : குழந்தை இளவரசானதும் அவர் நாட்டம் அரசியலில் இருந்தால் பெரிய சக்கரவர்த்தியாக வாழ்வார்.
அந்தணர்4 : உலக வாழ்க்கை வெறுத்துத் துறவு வாழ்க்கை மேற்கொண்டால் மிகச்சிறந்த துறவியாக வாழ்வார்.
சுத்தோதனர் : என்ன சொல்கின்றீர்கள்?
அந்தணர்1 : அரசியலில் இவருக்கு நாட்டமிராது. துறவியாகத்தான் போவார்...

காட்சி 17 (இடம் : நகர வீதிகள்/சித்தார்த்தன், சந்தகன், கிரிஷா கோதமி)
கிரிஷா கோதமி : தோழி, இளவரசர் சித்தார்த்தரின் அழகைப் பார்த்தாயா? மன்மனதின் மறுவுருவோ என்று எண்ணும்படியான உருவம். மாவீரனின் தோற்றம். அழகியரைச் சுண்டி இழுக்கும் காந்தக்கண்கள்.உண்மையில் இளவரசரைப் பெற்ற பெற்றோர் பேறு பெற்றவர்கள். அவரைக் கணவராக அடைந்த பெண்ணும் பேறு பெற்றவள். இந்த இளவரசராவது என்றும் இளமையோடு பல்லாண்டு வாழவேண்டும். வாழ்க இளவரசர்....
சந்தகன் : இளவரசே.. கேட்டீர்களா..கிரிஷாகோதமியின் வாழ்த்துக்களை.
சித்தார்த்தர் : கேட்டேன் சந்தகா...பேறு பெற்றோர் என்று சொல்லி என்னை வாழ்த்திய வாழ்த்துக்களைக் கேட்டேன். அந்த வாழ்த்தொலிகள் என்னை சிந்திக்க வைத்திருக்கிறது. பிணி, மூப்பு, மரணம் ஆகிய மூன்றையும் தவிர்த்து மக்கள் பெரு வாழ்வு வாழ வழி காண என்னை சிந்திக்க வைத்துவிட்டது. மரணமில்லாப் பெருவாழ்வு வாழ சரியான வழி காண என் அறிவு எனக்கு சொல்லிக்கொண்டிருக்கிறது........என்னை சிந்திக்க வைத்த அந்த கிரிஷாகோதமிக்கு இந்த முத்துமாலையைப் பரிசாகக் கொண்டு போய்க்கொடு. ஓட்டு ரதத்தை, நம் அரண்னைக்கு. நாளை மற்ற உர்களுக்கு நகர் வலம் சென்று வருவோம்.....

காட்சி 33 (இடம் : நதிக்கரை/த்தார்த்தர், பணிப்பெண் சுஜாதா/சித்தார்த்தர் ஞானம் பெறுதல்)
சித்தார்த்தர் மனம்: (மகிழ்ச்சியான குரலில்) இன்று நான் புத்தனாகிவிட்டேன்...வைகாசித்திங்களான பௌர்ணமி நாளான இன்று என் அறிவில் தெளிவு ஏற்பட்டுவிட்டது. இந்த உலகில் இன்பமாக வாழத்துடிக்கும் மனித உயிர்கள் துன்பப்படுவதற்கான காரணத்தை நான் கண்டறிந்து கொண்டேன். மக்கள் படும் துன்பங்களுக்கெல்லாம் காரணம் றியாமையும் ஆசையும்தான். .....உலக உயிர்களுக்கெல்லாம் எவன் கடுகளவும் தீமை செய்யாது வாழ்கிறானோ அவன்தான் பிறப்பு இறப்பற்ற ஓர் ஒப்பற்ற நிலைமையை அடையமுடீயும். இந்த உண்மையை உலக மக்கள் உணரும்படி செய்கிறேன்....

காட்சி 52 (இடம் : வனம்/புத்தர்-பிக்குகள்)
துறவி: பேரின்பம் பெற விரும்பும் மனிதர்கள் எப்படி இருக்கவேண்டும்?
புத்தர்: பேசமய சிந்தனை உள்ளவன், இரண்டு முனைகளுக்குப் போகலாகாது. ஒன்று - காமபோகத்தில் இன்பம் காண்பது, இது இழிவானது, அருவருப்புத் தருவது, சாமானிய மக்கள் கடைப்பிடிப்பது, சிறுமையுடையது, அனர்த்தம் விளைவிப்பது. மற்றொன்று- உடலை வருத்துதல், இந்த முனை துன்பம் பயப்பது, அனர்த்தம் விளைவிப்பது. இவைகளை நீக்கி என் அறிவிற்கண்டவைகள், மக்களை இன்ப வாழ்விற்கு அழைத்துச்செல்லும் என நம்புகிறேன்.........ஒவ்வொருவரும் தன் துன்பமும் பிறர் துன்பமும் ஒன்றே என்று உணரவேண்டும்.

காட்சி 96 (இடம் : ஆசிரமம்/புத்தர், ஆனந்தர்/புத்தர் வயிறு பாதிக்கப்படுதல்)
புத்தர்: ஆனந்தா, எனக்கு திடீரென்று வயிற்று வலி தாங்கமுடியவில்லை.
ஆனந்தர்: நல்ல உணவுதானே படைத்தார் அந்தப் பொற்கொல்லன் சுந்தன்.
புத்தர்: நானும் அப்படித்தான் நினைத்திருந்தேன். நறுமண சுவையுள்ள உணவோடு காட்டுப்பற்றி இறைச்சியையும் எல்லோருக்கும் போட சமைத்திருந்தார். அந்த இறைச்சியை எனக்கு மட்டும் போடச்சொல்லிவிட்டு மீதம் உள்ளதை மண்ணில் கொட்டிப் புதைக்கச் சொல்லிவிட்டேன்.
ஆனந்தர்: அப்படியா? நீங்கள் நேற்று என்னிடம் சொன்னது இன்று நடந்துவிட்டது. ததாகரரே.. ஏன் இப்படி உங்கள் உடம்பைக் கெடுத்துக்கொள்கிறீர்கள்.
புத்தர்: அந்த சுந்தன் எனக்காகச் செய்திருந்த காட்டுப்பன்றி இறைச்சியை நான் உண்ணாவிட்டால் அவன் மனம் நொந்துபோவான். நான் சாப்பிட்டது போல எல்லா பிக்குகளும் சாப்பிட்டிருந்தால் எல்லோரும் வயிற்று வலியால் துன்பப்பட்டிருப்பார்கள்....

காட்சி 99 (இடம் : ஆசிரமம்/சுபத்திரர், பிக்கு ஆனந்தர், அனுருத்தர்/கடைசி சீடர் சுபத்திரர் சந்திப்பு)
புத்தர்: சுபத்திரரே, தூய உள்ளத்துடன் நான் சொல்லியிருக்கும் எட்டு சீலங்களைக் கடைபிடித்து ஒழுகி, பிறர்பால் யார் தயையுடன் நடந்துகொள்கிறார்களோ அவர்கள் மேலான கதியை அடைவர்.....என்னுடைய அணுக்கத்தொண்டர் பிக்கு ஆனந்தரைக் கேட்டுத் தெரிந்தகொண்டு சங்கத்தில் சேர்ந்துகொள்ளுங்கள்.
சுபத்திரர்: நன்றி பெருமானே, வருகிறேன்..
புத்தர்: ஆனந்தா.......பிக்குகளே......நீங்களும் அருகில் வாருங்கள்.....ஏன் இப்படி துயரத்தோடு நின்றுகொண்டிருக்கின்றீர்கள்? உங்களுக்கு ஏதேனும் ஐயமிருந்தால் இப்பொழுதே என்னிடம் கேட்டு அவற்றை அகற்றிக்கொள்ளுங்கள். ததாகதர் உயிருடன் இருக்கும்போது ஐயங்களைக் கேட்டுத் தெரிந்துகொள்ளாமல் போய்விட்டோமே என்ற ஏக்கம் இருக்கக்கூடாது. ஏன் மௌனமாக இருக்கிறீர்கள்?....பஞ்ச பூதங்களின் சேர்க்கையால் உண்டான எந்தப் பொருளுக்கும் அழிவு உண்டு. இதை எப்பொழுதும் நினைவில் இருத்திக்கொண்டு விழிப்புடன் இருங்கள். நிர்வாணப்பேற்றை அடைவதற்கு உண்மையோடும், ஊக்கத்தோறும் உறுதியோடும் முயலுங்கள். (பெருமானின் கண்களின் பார்வை மேல் நோக்கி மறைந்துகொள்கிறது).
ஆனந்தர்: பெருமானே..பெருமானே...எங்களைத் தனியாக விட்டுவிட்டுப் போய்விட்டீர்களே...(புலம்பி அழுகிறார் குழந்தை போல)..பெருமை வாய்ந்த அனிருத்தரே பெருமான் காலமாகிவிட்டதைப் பார்த்தீர்களா? (அழுகை)

நூல்: அறிவுப் பேரொளி புத்தர் பெருமான் (வரலாற்று நாடகம்)
ஆசிரியர்:  கலைமாமணி பட்டுக்கோட்டை குமாரவேல்
பதிப்பகம்:  சிந்துமலர் வெளியீடு, 57, டி.எஸ்.வி. கோவில் தெரு, மயிலாப்பூர்,
சென்னை 600 004
ஆண்டு : 1997
விலை : ரூ.70
----------------------------------------------------------------------
இந்நூலைப் பற்றி விக்கிபீடியாவில் நான் துவங்கியுள்ள பதிவினை பின்வரும் இணைப்பில் காணலாம். தொடர்ந்து இப்பக்கம் மேம்படுத்தப்படும். 
----------------------------------------------------------------------