பௌத்த சுவட்டைத் தேடி : பரசுராமர் குளம்

8 மார்ச் 2014 
இன்று மதியம் முதல் எனக்கு தொடர்ந்து நண்பர்களிடமிருந்தும், அறிஞர்களிடமிருந்தும் தொலைபேசி அழைப்புகள். "தஞ்சாவூரில் ஏதோ சமணர் சிலை கண்டுபிடித்துள்ளார்களாம், பார்த்தீர்களா? சிலர் புத்தர் என்றும் கூறிக்கொள்கிறார்கள்". தொடர்ந்து மாலை செய்தித்தாளில் 'தஞ்சையில் இன்று மீன் வலையில் சிக்கிய சாமி சிலைகளை அதிகாரிகள் மீட்டனர்' என்ற தலைப்பில் செய்திவெளியாகியிருந்தது.  வலையில் இரு சிலைகள் சிக்கியதாகவும் அதில் ஒன்று மகாவீரர் சிலை என்றும் இன்னொரு சிலை 11 முகங்களைக் கொண்ட பிரம்மமூர்த்தி சிலை என்றும் குறிப்பிடப்பட்டிருந்தது.

செய்தியுடன் காணப்பட்ட புகைப்படத்தைப் பார்த்தபோதே ஒரு சிலை புத்தர் சிலை, மகாவீரர் சிலை அல்ல என்பதை உணரமுடிந்தது. 

9 மார்ச் 2014

மறுநாள் காலையில் செய்தித்தாள்களில் தஞ்சாவூர் மருத்துவக்கல்லூரி சாலை ரெட்டிப்பாளையம் சாலையின் அருகில் உள்ள குளத்தில் (ராமநாதபுரம் ஊராட்சி, காமாட்சிபுரம் பகுதியில் உள்ள பரசுராமர் குளம்) மீனவர்கள் மீன் பிடித்துக்கொண்டிருந்தபோது மீனவர் வலையில் இரு சிலைகள் சிக்கியதாக செய்தி வெளியாகியிருந்தது. சில செய்தித்தாள்களில் முதலில் காணப்படுகின்ற சிலை சமணர் சிலை என குறிப்பிடப்பட்டிருந்தது. புகைப்படத்தைப் பார்த்தபோது முதலாவதாக உள்ளது புத்தர் சிற்பமென்பதும்,  சமண தீர்த்தங்கரர் சிற்பம் அல்ல என்பதும் உறுதியாகத் தெரிந்தது. புத்தர் சிற்பத்தில் தலையில் காணப்படுகின்ற தீச்சுடர், நெற்றியில் திலகக்குறி இச்சிற்பத்தில் உள்ளன. உடல் முழுக்க ஆடை காணப்படுகிறது. வழக்கமாக புத்தர் சிற்பத்தில் காணப்படுகின்ற அமைதி தழுவும் கண்கள், புன்னகை சிந்தும் உதடுகள், நீண்டு தொங்கிய காதுகள் இச்சிற்பத்தில் காணப்படுகின்றன. தாமரைப்பீடத்தில் நின்ற நிலையில் காணப்படும் புத்தர் சிற்பங்களில் பொதுவாக வலது கை அபய முத்திரையுடனும், இடது கை வரத முத்திரையுடனும் காணப்படும். இச்சிற்பத்தில் வலது கை வரத முத்திரையுடன் உள்ளது. இடது கை மேலாடையைப் பிடித்த கோலத்தில் உள்ளது.


10 மார்ச் 2014

பத்திரிக்கைகளில் செய்தியையும், புகைப்படங்களையும் பார்த்தபின் அச்சிற்பங்களை நேரில் பார்க்கவேண்டும் என்ற எண்ணம் தோன்றியது. செய்திகளின் அடிப்படையில் அச்சிற்பங்கள் தஞ்சாவூர் வட்டாட்சியர் அலுவலகத்தில் இருப்பதையறிந்து அங்கு சென்றேன். மாவட்டக் கருவூல அலுவலகத்தில் கண்காணிப்பாளராளப் பணியாற்றும் என் நண்பர் திரு முத்துக்குமரன் என்னுடன் வந்தார். என்னைப் பற்றியும், எனது ஆய்வைப் பற்றியும் அறிமுகப்படுத்திக் கொண்டு அந்த சிற்பங்களை, குறிப்பாக அந்த புத்தர் சிற்பத்தை, பார்க்கவேண்டும் என்ற எனது ஆவலை வெளிப்படுத்தினேன். வட்டாட்சியர் திரு இரா.காமராஜ் பெருமனதுடன் இரு சிற்பங்களையும் கொணரவைத்தார். நேரில் சிற்பங்களைப் பார்த்தேன். சில செய்தித்தாள்களில் சமணர் என குறிப்பிட்டிருந்ததைப் பற்றி அவரிடம் கூறினேன். அவர் அச்சிற்பத்தை என்னிடம் காட்டியபோது அதில் புத்தர் என்றே குறிக்கப்பட்டிருந்தது. அதை அவரும் உறுதி செய்தார். அலுவலகத்தில் இருந்த சிற்பங்களைப் பார்க்க அனுமதி வழங்கிய வட்டாட்சியருக்கு நன்றி கூறிவிட்டுக் கிளம்பினேன். 

நாகப்பட்டின புத்த செப்புத்திருமேனிகள்
சோழ நாட்டில் பௌத்தம் என்ற எனது ஆய்விற்காக வெளிநாடு மற்றும் இந்தியாவிலுள்ள அருங்காட்சிகளிலிருந்து பெறப்பட்ட நாகப்பட்டின புத்த செப்புத்திருமேனியில் காணப்படும் சில கூறுகளை தஞ்சாவூரில் காணப்பட்ட இச்சிற்பத்தில் காணமுடிந்தது. நின்ற நிலையிலுள்ள ஒரு நாகப்பட்டின புத்த செப்புத்திருமேனி தஞ்சாவூர் அரண்மனைக் கலைக்கூடத்தில் காட்சியில் உள்ளது. திரு அய்யம்பேட்டை செல்வராஜ் உதவியோடு மேற்கொண்ட களப்பணியின்போது ஒரு நாகப்பட்டின புத்தர் செப்புத்திருமேனியை அய்யம்பேட்டையில் காண முடிந்தது.  சென்னை அரசு அருங்காட்சியகத்தில் நாகப்பட்டின புத்த செப்புத்திருமேனிகள் அழகாக காட்சிப்படுத்தப்பட்டுள்ளன. இச்சிற்பத்தின் காலம் உறுதி செய்யப்படவேண்டும்.

துணை நின்றவை

• தஞ்சையில் இன்று மீன் வலையில் சிக்கிய சாமி சிலைகளை அதிகாரிகள் மீட்டனர், மாலை மலர், 8.6.2014
• ஐம்பொன் சிலைகள் குளத்தில் கண்டெடுப்பு, தினமலர், 9.6.2014
• தஞ்சை அருகே குளத்தில் சாமி சிலைகள் கண்டெடுப்பு, மீன் பிடிக்க வலை விரித்தபோது சிக்கின, தினத்தந்தி, 9.6.2014
• மீன் வலையில் சிக்கிய ஐம்பொன் புத்தர் சிலை, தி இந்து, 9.6.2014
• தஞ்சை அருகே குளத்தில் புத்தர் சிலை மீன்பிடி வலையில் சிக்கியது, தினமணி, 9.6.2014
• குளத்தில் மீனவர் வலையில் ஐம்பொன் சிலைகள் சிக்கியது, தினகரன், 9.6.2014

-------------------------------------------------------------------------------------------

நன்றி: திரு இரா.காமராஜ், திரு முத்துக்குமரன், நாளிதழ்கள்,

புகைப்படங்கள் தி இந்து

-------------------------------------------------------------------------------------------