பௌத்த சுவட்டைத் தேடி : மானம்பாடி

1960
பி.ஆர்.சீனிவாசன் (1960), சிவராமலிங்கம் (1997) உள்ளிட்ட அறிஞர் பெருமக்கள் மானம்பாடியில் உள்ள புத்தர் சிலையைப் பற்றிக் கூறியுள்ளனர். பாண்டிச்சேரி பிரெஞ்சு ஆய்வு நிறுவனம் (French Institute of Pondicherry) தன் தொகுப்பில் இச்சிலையின் புகைப்படத்தைக் கொண்டுள்ளது. தமிழக அரசு வெளியிட்டுள்ள தமிழ்நாட்டு வரலாறு சோழப்பெருவேந்தர் காலம் (1998) என்னும் நூலில் இப் புத்தரைப் பற்றிய குறிப்பு உள்ளது. முதல் களப்பணியின்போது கேட்பாரற்று இருந்த புத்தர் தற்போது வழிபாட்டில் உள்ளதைப் பகிர்வதே இப்பகிர்வு.

ஏப்ரல் 1995
நான் புத்தர் சிலைகளைப் பற்றி விசாரித்தபோது பல அறிஞர்கள் கூறிய இடம் திருப்பனந்தாள் அருகே உள்ள மானம்பாடி. கல்வெட்டறிஞர் கும்பகோணம் திரு சேதுராமன் அவர்களைச் சந்திக்கச் சென்றபோது அவர், கும்பகோணம் கும்பேஸ்வரர் கோயிலில் உள்ள எலந்துறை புத்தர் கோயில் தொடர்பான கல்வெட்டு பற்றி விரிவாகக் கூறிவிட்டு மானம்பாடி புத்தர் சிலையைப் பற்றிக் கூறினார். அப்போது அச்சிலையைப் பார்க்கும் வாய்ப்பு கிடைக்கவில்லை.  

அக்டோபர் 1998

மூன்றாண்டுகள் கழித்து அங்கு செல்லும் வாய்ப்பு கிடைத்தது. களப்பணியின்போது என் மகன் பாரத், துணைக்கு வந்தான். எலந்துறையில் புத்தர் கோயில் இருந்ததற்கான சான்றைத் தேடி அலைந்து, பெருஞ்சேரியில் புத்தர் சிலையைப் பார்த்துவிட்டு இருவரும் கும்பகோணம் வந்து சேர்ந்தோம். தஞ்சாவூர் சேருவதற்கு முன்பாக வேறுஏதாவது புத்தர் சிற்பம் உள்ளதா என நான் சிந்தித்தபோது மானம்பாடி நினைவிற்கு வந்தது. உடன் வந்த என் மூத்த மகனைப் பார்த்தேன். மறுபடியும் ஒரு புத்தரைப் பார்க்கும் ஆசை அவனுக்கும் வந்துவிட்டது. கும்பகோணம்-பந்தநல்லூர் பேருந்தில்  சோழபுரத்திற்கு அருகேயுள்ள மானம்பாடி சென்றோம். புகைப்படக் கருவியை அவனிடம் கொடுத்துவிட்டேன். அவன் ஆவலோடு புத்தரைப் புகைப்படம் எடுத்தான். அவன் எடுத்த பெருஞ்சேரி புகைப்படம் எனது ஆய்வேட்டில் இடம்பெறும் என்றதும் அவனுக்கு அதிக மகிழ்ச்சி.  நிறைவான பயணத்தை முடித்துவிட்டுத் திரும்பினோம்.

 

சோழ நாட்டில் உள்ள அழகான புத்தர் சிலைகளில் இதுவும் ஒன்று. எங்கும் அடர்ந்த செடிகள். மண்டிக்கிடந்த செடிகளுக்கிடையே புத்தர் அமர்ந்த நிலையில் தியான கோலத்தில் இருந்தார்.

மே 2002

புத்த பூர்ணிமா தினத்தன்று (26 மே 2002) சிலை இருந்த இடம் சுத்தம் செய்யப்பட்டு, புத்தருக்குச் சிறப்பு பூஜைகள் நடத்தப்பட்டன. அதுதொடர்பாக நாளிதழில் வெளியான நாளிதழ் ("Symbolic of harmony", The Hindu, May 31, 2002) செய்தியில் நான் கூறிய கருத்துகள் இடம்பெற்றிருந்தன. 

ஜனவரி 2005
இச்சிலையைக் களவாட மேற்கொள்ளப்பட்ட முயற்சி புதுக்கோட்டை மாவட்டம் கீரனூர் அருகே முறியடிக்கப்பட்டு, மறுபடியும் மானம்பாடிக்கு வந்து சேர்ந்தது. பழைய இடத்திற்கு வந்த புத்தருக்கு மறுபடியும் உள்ளூர் மக்களால் பூசைகள் நடத்தப்பட்டன. (கும்பகோணம் அருகே திருட்டுப்போன புத்தர் சிலை மீட்பு, தினத்தந்தி, 4.1.2005)

 ஜூலை 2007
பின்னர் அந்த இடம் மிகச் சிறப்பாக சில காலம் பராமரிக்கப்பட்டு வந்ததை தொடர்ந்து மேற்கொள்ளப்பட்ட பணிகளின்போது காணமுடிந்தது. கேட்பாரற்றுக் கிடந்த அந்த சிலைக்கு கம்பிகளால் தடுப்பு வேலி அமைக்கப்பட்டிருந்தது. முட்புதர் மறைந்து சிலை அனைவரும் காணும்படி அழகாகக் காட்சிப்படுத்தப்பட்டிருந்தது. (கும்பகோணம் அருகே மானம்பாடியில் உள்ள புத்தர் சிலையைப் போற்றி பாதுகாக்க கோரிக்கை, தினமலர், 16.7.2007)

மார்ச் 2010
குத்தாலம், பெருஞ்சேரி, பந்தநல்லூர், சிக்கநாயக்கன்பேட்டை ஆகிய இடங்களில் களப்பணி முடித்துவிட்டு, மானம்பாடி செல்லும் வாய்ப்பு கிடைத்தது. பேருந்தைவிட்டு இறங்கி முன்னர் புத்தர் இருந்த இடத்திற்குச் சென்றேன். சிறிய அதிர்ச்சி காத்திருந்தது. முந்தைய களப்பணியின்போது நான் பார்த்த இடத்தில் புத்தர் சிலை இல்லை.  செடிகளோடு மறைந்துவிட்டதா என எண்ணித் தேட ஆரம்பித்தேன். அந்தப் பகுதி முழுவதையும் தேடினேன். எந்தத் தடயமும் இல்லை. நான் அந்த இடத்தில் பல நேரம் தனியாக எதையோ தேடிக் கொண்டிருந்ததைக் கண்ட உள்ளூரைச் சேர்ந்தவர்கள் என்னிடம் என் தேடலைப் பற்றி விசாரித்தனர். நான் புத்தர் சிலையைப் பற்றிக் கூறியதும், கடந்த சில ஆண்டுகளாக அவ்வப்போது இடம் மாறியது பற்றியும், ஒரு முறை திருட முயற்சி நடந்தது பற்றியும் கூறி வருத்தப்பட்டனர். சிலையின் நிலையைப் பற்றிக் கேட்டபோது அருகில், எதிர்ப்புறத்தில் உள்ள வடபத்ர காளியம்மன் கோயிலில் இருப்பதாகக் கூறினர். அக்கோயிலில் புத்தர் சிலை வைக்கப்பட்டிருந்தது. முதல் களப்பணியின்போது கேட்பாரட்டுக் கிடந்த புத்தர் தற்போது வழிபாட்டில் இருப்பதைக் கண்டதும் மன நிறைவு ஏற்பட்டது. இந்த புத்தரை பாதுகாக்கவும், வழிபாட்டுக்குக் கொணரவும் தனியார் அமைப்புகளும் உள்ளூர் மக்களும் செய்துவரும் முயற்சி பாராட்டத்தக்கதாகும்.

8 மே 2021

என்னுடைய நூலான சோழ நாட்டில் பௌத்தம் அச்சாகிக்கொண்டிருந்த நிலையில் மானம்பாடிக்குச் சென்றேன். எங்கள் மூத்த மகன் ஜ.பாரத் உடன் வந்தான். சாலை விரிவாக்கம் காரணமாக கோயில் சற்று உள்ளடங்கி இருந்தது.  அக்கோயில் குடமுழுக்கு ஆகியிருந்தக் காணமுடிந்தது.  இப்போது புத்தர் சிலை கோயிலின் இடது புறத்தில் இருந்தது. புத்தரைப் பார்த்துவிட்டு அங்கிருந்து திரும்பினேன்.

டிசம்பர் 2023

என்னுடைய நூலின் ஆங்கிலப்பதிப்பு (Buddhism in Chola Nadu)  அச்சாகிக்கொண்டிருந்த நிலையில் மானம்பாடி சென்று, புத்தரையும் கண்டு வந்தேன். கோயிலின் திருப்பணி முற்றிலும் நிறைவடைந்த நிலையில் இருந்தது.

2023

இந்தப் புத்தர் சிலை என்னுடைய நூலின் தமிழ், ஆங்கிலப் பதிப்புகளிலும் (சோழ நாட்டில் பௌத்தம், புது எழுத்து, 2022, ப.127), (Buddhism in Chola Nadu, Pudhu Ezuthu, 2023, p.102) ஆவணப்படுத்தப்பட்டுள்ளது.

24.12.2025இல் மேம்படுத்தப்பட்டது.